Un congreso internacional centrará un debate arredor das políticas e prácticas universitarias en materia de coñecemento, tecnoloxía e ensino

O prazo para presentar pósteres, simposio ou comunicacións orais manterase aberto ata o próximo 5 de setembro

Actualizada: 04-06-2012 12:53. Enlace

 

O I Congreso Internacional ‘Coñecemento, tecnoloxías e ensinanza: políticas e prácticas universitarias’ abrirá un debate, “por e para universitarios”, arredor dalgúns dos problemas contemporáneos das universidades. Segundo sinalan os seus organizadores, o propósito é identificar as voces da universidade pública ante o conxunto de demandas cruzadas procedentes dos diferentes organismos e axencias nacionais e internacionais. Trátase de reflexionar acerca das relacións entre as políticas e as prácticas nas universidades, nas economías e sociedades da información e o coñecemento, poñendo o foco en como afectan aos procesos de ensino e aprendizaxe.
Do 6 ao 8 de febreiro de 2013 en Santiago, organizan o congreso a USC e a Universidade Nacional de Córdoba de Arxentina no contexto do proxecto de cooperación ‘Universidade na sociedade do coñecemento. Fortalecemento institucional de áreas dedicadas á ensinanza universitaria con novas tecnoloxías’.  Esta é unha liña incorporada no conxunto de actuacións levadas a cabo pola RED UNISIC (Universidade e Sociedade da Información e o Coñecemento) que coordina a USC dende 2006 co apoio da Axencia Española de Cooperación Internacional para o Desenvolvemento (AECID)
O prazo para a presentación de pósteres, simposio ou comunicacións orais manterase aberto ata o próximo 5 de setembro. Entre os posibles temas a abordar, a organización propón como referencia novos procesos de produción distribución e difusión do coñecemento en materia de políticas de coñecemento nas universidades; transformacións organizacións, institucionais e tecnolóxicas nas universidades; perspectivas, tensións e tendencias no traballo docente universitario; experiencias e tendencias en dispositivos e contornos na ensinanza; prácticas de estudo e socialización na universidade; e límites e oportunidades das redes universitarias e a cooperación. 

Para acadar máis información sobre este congreso, as persoas interesadas poden visitar a web http://contece.ffyh.unc.edu.ar/ ou dirixirse ao Departamento de Didáctica e Organización Escolar. A profesora Adriana Gewerc é a coordinadora do Comité Científico do encontro.